കൊവിഡ് 19 പടര്ന്നു തുടങ്ങിയപ്പോള് രോഗം സ്ഥിരികരിക്കാന് നമ്മള് ആശ്രയിച്ചിരുന്നത് പൂനെയിലെ ഇന്സ്റ്റിറ്റ്യൂട്ടിനെയായിരുന്നു. പക്ഷെ, കൊവിഡ് 19 ഉള്പ്പെടെ വൈറസ് രോഗങ്ങള് പരിശോധിച്ച് കണ്ടെത്താനുള്ള സംവിധാനങ്ങള് നെയ്യാറ്റിന്കരയിലെ നിംസ് മെഡിസിറ്റിയിലുണ്ടായിരുന്നു! സംസ്ഥാനത്തെ ആദ്യ ഹ്യൂമന് ജെനറ്റിക് ആന്ഡ് മോളിക്യൂലാര് ബയോളജി ലാബ് 'നിംസി'ല് സജ്ജമായിരുന്നു. എന്.എ.ബി.എല് അക്രഡിറ്റേഷന് കിട്ടാത്തതു കാരണമാണ് ലാബില് പരിശോധന നടത്താന് കഴിയാതെ പോയത്. ഇക്കാര്യം മുഖ്യമന്ത്രി പിണറായി വിജയന് തന്നെ ഒരിക്കല് വാര്ത്താസമ്മേളനത്തില് സൂചിപ്പിക്കുകയും ചെയ്തു.
ജനിതക ഘടന, ഡി.എന്.എ, ആര്.എന്.എ സ്വീക്വന്സിംഗ്, വൈറസിന്റെ സാനിധ്യം, ഘടന എന്നിവയൊക്കെ കണ്ടെത്താന് ശേഷിയുള്ള ലാബില് ഉപകരണങ്ങളെല്ലാം എത്തിച്ചത് അമേരിക്കയില് നിന്ന്. 2017 ല് തുടങ്ങി, ആറു മാസം മുമ്ബാണ് പൂര്ത്തിയാക്കിയത്.
ഇപ്പോള് മുഖ്യമന്ത്രിയുടെ ഇടപെടലിന്റെ ഫലമായി ശ്രീചിത്ര മെഡിക്കല് ഇന്സ്റ്റിറ്റ്യൂട്ടിലെ വിദഗ്ദ്ധര് ഉടന് തന്നെ 'നിംസി'ല് എത്തുമെന്ന് അറിയിപ്പു ലഭിച്ചതായി നിംസ് മെഡിസിറ്റി എം.ഡിയും തമിഴ്നാട് നൂറുല് ഇസ്ലാം സര്വകലാശാലാ പ്രോ- ചാന്സലറുമായ ഫെസല്ഖാന് പറഞ്ഞു.കേരളത്തിലെ ആദ്യത്തെ ഹ്യൂമന് ജെനറ്റിക് ആന്റ് മോളിക്യൂലാര് ബയോളജി ലാബ് സ്ഥിതി ചെയ്യുന്നത് എവിടെ എന്നൊരു ചോദ്യം ഈയിടെ പി.എസ്.സിയുടെ ഒരു മത്സര പരീക്ഷയിലുണ്ടായിരുന്നു. ഓപ്ഷനുകളില് ശരിയുത്തരം തിരുവനന്തപുരം എന്നായിരുന്നു. കുറച്ചു കൂടി ശരിയാക്കിയാല് അത് നെയ്യാറ്റിന്കരയിലെ നിംസ് മെഡിസിറ്റി എന്നു പറയാം.
പ്രതിദിനം 200 പേരുടെ സാമ്ബിളുകള് പരിശോധിക്കാനാകും. നാലു മണിക്കൂറിനുള്ളില് ഫലം. ജനിതക ഘടനയെക്കുറിച്ച് പഠിക്കാനും പാരമ്ബര്യ രോഗങ്ങളുടെ ജീനുകള് എപ്പോഴാണ് ശരീരത്തില് പ്രവര്ത്തിച്ചു തുടങ്ങുന്നതെന്ന് മുന്കൂട്ടി അറിയാനും അതനുസരിച്ച് ചികിത്സ ആരംഭിക്കാനും കഴിയുമെന്നതാണ് ഇതിന്റെ ഏറ്റവും വലിയ മെച്ചം. ലാബുമായി ബന്ധപ്പെട്ട് കേരള അക്കാഡമി ഒഫ് സ്കില് എക്സലന്സില് ബയോടെക്നോളജി വിദ്യാര്ത്ഥികള്ക്ക് പരിശീലനം നല്കാന് ഒരു പദ്ധതി സമര്പ്പിച്ചിരുന്നു. ഒരു വര്ഷത്തോളം അത് ഫയലില് വച്ചിട്ട് അവസാനം പറ്റില്ലെന്നു പറഞ്ഞു. അതു നടന്നിരുന്നെങ്കില് കുറേപ്പര്ക്ക് പരിശീലനം നല്കാന് കഴിയുമായിരുന്നുവെന്ന് ഫൈസല്ഖാന് പറഞ്ഞു.
